Богата историја има ракометот во Прилеп. Но покрај резултати, успеси, во сеќавање се и условите во кои се одигруваа мечевите. Така, машката екипа Тутунски комбинат првенствените натпревари од Втората југословенска лига – Југ како домаќин долги години ги одигруваше на асфалтното игралиште кај Вишата економска школа, сега во близина на Гимназијата „Мирче Ацев“. Тука од едната страна имаше мала трибина со неколку реда за гледачите, додека на другата страна гледачите беа на земјена површина, малку подигната. Последниот првенствен меч на ова игралиште е одигран на 16 ноември 1975 година, со Рудар Плевља (Црна Гора), а резултатот е 39:32 за Тутунски комбинат, во дуел од 11. коло на Втората лига – Југ.
Пролетта 1976 година се случи преселбата во Универзалната сала. Така, првиот првенствен меч во овој објект е одигран на 11 април 1976 година, а тоа е Тутунски комбинат – Будуќност од Титоград/Подгорица (Црна Гора) 36:30, во 13. коло од Втората лига – Југ. Тогаш за Тутунски комбинат настапуваа: Тошко Арапчески, Влатко Коруноски, Гоце Бозароски, Ангеле Гулески, Војо Станисављевиќ, Ацо Ковилоски, Стеван Николоски, Драган Алексоски, Целе Секулоски, Пеце Велјаноски, Петар Кузманоски, Диме Карески и други.
Следната година (1977) на располагање беше и салата „Македонија“.
