Денеска прилепска Победа освои само бод (со резултат 0:0) во Неготино со домашниот Вардар, но тој еден бод е мошне значаен и вреден за сите што се приврзани за клубот. Вреден е затоа што е освоен по пауза од цел месец (по победата од 2:1 во Струмица со Беласица на 25 октомври) и затоа што е освоен со безмалку младинска екипа – со 16 младинци и само еден малку повозрасен од нив, 22-годишниот Мартин Талески.
Колку денеска Победа настапи со млад состав зборува и информацијата дека капитенот има само 18 години. Тој е Димитар Шаркоски, веќе познат на јавноста, роден на 3 август 2007. Честопати повикуван е во разни селекции на Македонија па оттука и не е некое големо изненадување што ја добил лентата на левата рака од шефот на Стручниот штаб Филип Мирчески.
Потсетуваме на сите во записникот: Марко Николоски, Мартин Талески, Лука Варошаноски, Мохамед Ахмедов, Марио Тасески (74. Мартин Митрески), Стефан Наскоски (89. Роберт Аризанкоски), Трене Тренески (74. Владимир Зарески), Димитар Шаркоски, Леонид Митрески, Гоце Кузманоски, Андреј Петрески, како и Виктор Анѓелевски, Гоце Петрески, Бојан Смилески.
Највозрасниот има само 22 години, еден 21, еден 20, седуммина 18, шестмина 17, дури еден има 16 – Гоце Кузманоски роден на 19 март 2009.
По овој бод очекувањата се позитивни – клубот да ја добие финансиската поддршка за да се реализираат исплатите, потоа со поискусните и со младите играчи да се состави силна екипа за последниот есенски меч дома со штипска Брегалница.
