Само што се објави веста дека ФК Победа стартува со продажбата на сезонски влезници од по 1.200 денари, веднаш се јави првиот купувач. И тој не е од Прилеп, не е ниту прилепчанец! Затоа е големото задоволство. Тој е Анѓелко Тошевски, роден во Кавадарци пред 72 години, сега жител на Велес, но страсен навивач на прилепска Победа. Ако бараме најверен, најголем навивач на Победа надвор од Прилеп, сигурно тој е! Сепак овој поим „навивач“ е неприфатлив за него.
-За Победа не се навива, Победа се сака! Навивам за Реал – вели Тошевски.
Којзнае колкупати има патувано од Велес до Прилеп и до други места само поради Победа, а сега одлучи да одвои 3.600 денари од својата пензија за три сезонски билети да им подари на тројца навивачи на Победа коишто се финансиски немоќни и сами не можат да ги купат.
Каква љубов! Тошевски е со Победа безусловно – и кога таа беше третолигаш, и кога беше шампион, и кога беше најдобар македонски претставник на европската сцена, па и сега кога е во второлигашкото друштво. На фотографијата што ја објавуваме е во најсаканиот дрес, дрес што го купи неодамна.
