Прилеп живее со Победа со децении, близу еден век. Затоа не може да се замисли животот на прилепчаните без Победа, без нејзино учество во пролетниот дел од Втората лига, сценарио најавено јавно, преку медиумите. Доколку тоа се случи, има прилепчанец Кире Иваноски – Балче, пензионер, којшто најавува – самозапалување!
– Излегувам од болница Отешево и доаѓам в сабота на натпреварот Победа – Новаци. Во спротивно земам збогум со моите прилепски фудбалџии и се самозапалувам на центарот на фудбалскиот храм, Градскиот стадион „Гоце Делчев“ во Прилеп! Нема сила што може да ме спречи! Амин!!! Збогум! Се за Победа! Победа вечна, народе мој! Животот мој зависи од Победа Прилеп и од вас, фудбалџии мои драги и мили! Амин! – напиша Кире Иваноски на Фејсбук.
Пред одење во болницата Отешево, Кире Иваноски – Балче беше еден од оние прилепчани коишто секој ден напладне се собираа во центарот на Прилеп, кај јарболот, за да покажат дека Прилеп не се согласува со одлуката за згаснување на Победа и неиграњето на пролетниот дел од второлигашкото првенство.
